غير مصنفمحافظات

شاهد عيان يروى تفاصيل حرق مسلحين لأكثر من٤٠ سيارة ومعدة ثقيلة بشمال سيناء

شاهد عيان يروي تفاصيل حرق مسلحين لاكثر من 40 سيارة ومعدة بطريق وسط سيناء:
كتبت / امل اللقانى

واحنا ماشين بسيارتنا على الطريق بنبص لاقينا سيارات وتريلات والقلابات بتاعه الشركات الي هيا شغاله بالطريق كلها مولعه اكتر من اربعين عربيه مولعه يمين ويسار الطريق وأحنا في قمه التعجب ازاى ده بيحصل هوا فى ايه بالظبط ومفيش غيرنا على الطريق وبنبص لاقينا نفسينا قدامهم وكانوا لسه بيبتدوا يولعوا فى عربيه تريلا على الطريق ووقفونا.

كانوا ست افراد محملين بجميع انواع السلاح ولابسين حزام وفيه جيوب مليان طلقات من الرصاص وكانوا معاهم عربيه دفع رباعى سألنا أنتم مين وشغالين مع مين ومين المقاول الي انتم شغالين معاه وعندكم كم معده وانواعهم وموقعكم كم يبعد من هنا جاوبناه على جميع الأسئلة إلي سألها واثناء ما اخدوا البطايق بتاعتنا لاقيتهم مطلعين ورقه تقريبا فيها اسماء ناس مطلوبه هما بيدوروا عليهم وهددونا وقالولنا لو شفناكم تانى هنا أو العربيه دى هندبحكم كلكم انتو فاهمين قلنا طبعا فاهمين لو شفتنا تانى ولع فينا.

واخدنا البطايق وتليفوناتنا تانى وقالولنا امشوا قدام شويه عند علامه على الطريق واحنا هنجيلكم تانى المهم رحنا وقفنا هناك وكنا قدام خلاطة اسفلت لسه صاحبها جايبها جديده ولسه متركبه بقالها شهر واحنا قدامها وعماله تنفجر واحنا طبعا فى قمه الرعب فضلنا بتاع ساعه ونص جالسين بالعربيه وواحد مننا نزل من العربيه ومشى قدام شويه لاقيناهم قطعين الطريق بقطع اسفلتيه سدين بيها الطريق.

كنا خايفين نشيل الاسفلت المتكسر ده قلنا يكون حاطين قنبله ولا حاجه المهم الواقفه طولت برده وكان بيننا وبين كمين من الجيش كمين أسمه كمين جعل بحوالى أتنين كيلو بس واكيد الكمين عرف الي حصل ده المهم قلنا زى ما تيجى رحنا شلنا قطع الاسفلت يا دوب وركبنا وطلعنا على طول لغايه ما وصلنا الكمين وكنا خايفين يضربوا علينا نار احسن يفتكرونا أننا منهم.

كلمنا واحد نعرفه قالنا أدخلوا متخافوش انا كلمتهم وبالفعل دخلنا الكمين ولاقيناه كلمهم ومستعدين لاى هجوم منهم وجلسنا شويه وجابوانا مايه  نشربها وسالونا شويه اسئله وطلعوا قدامنا مدرعه لتأمين الطريق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock