غير مصنفمقالات

لو عاوزين تخسروا بنتكم

      امـــــل اللقـــــانى تكـــــتب

بالرغم من صعوبة العنوان والصعوبه الأكثر فى الكلمات التى بين الأسطر التاليه الا انى سأسرد الكلمات
كلمات كتبتها / ايــــه جمعــــه
وحبيت انشرها لكى نتقى الله فى بناتنا
ايه بتقول / ازاى تخسروا بنتكم ؟؟؟


_  قللوا من كل حاجة هي بتحبها أو بتهتم بيها .
_ اتكلموا عن صحابها وحش و قولولها انهم مبوظينها .
_ قللوا ثقتها في نفسها .
_ هينوها .. اتكلموا عنها وحش قدام الناس وسبوهم يتسلوا عليها بالنصايح اللي هما مش بيعملوا بيها أصلًا .

_ زعقوا فيها عمال على بطال .
_ خلوها تحب قعدة الشارع مع صحابها أكتر من قعدة بيتكم اللي ليها باب مقفول .
_ قارنوا بينها وبين قرايبها وخلوها دايمًا هي الخسرانه في المقارنة .
_ أتكلموا عن عيوبها وكل حاجة بتقصر فيها قدام الناس .. مش وحش بردو أنكوا تعاتبوها وتحاسبوها قدام الناس.
_ ارمولها فلوس .. أكتر من الحنية والحب والأمان .. وأرجعوا ذلوها بالفلوس دي .
_ ماتحضنوهاش .. لما قلبكوا مايطاوعكمش تحضنوا بنتكوا ، هي قلبها مش هيطاوعها تطبطب على ايدكوا حتى .
_ دوروا على كل حاجة هي بتحبها و بوظوهالها  .
_ مدوا أيدكوا عليها بعد ما بقت طولكوا .
_ بدّل الضحكة في وشها بـ أنتقادها ،، بدّل المدح فيها لما تعمل حاجة حلوة
بـ كلمة ” جتك خيبة يعني انتي كدة عملتيلنا أحنا حاجة ! ماهو لنفسك “.
_ حاولوا تخلوها نسخة منكوا .

_ اتحاموا فـ إنكوا أب / أم .. وحرام يتعصيلكوا كلمة ، حرام يترفضلكوا طلب
، حرام يتقالكوا أُووف .. اتحاموا في كل الصلاحيات اللي معاكوا عشان انتوا
أب و أم .. ومش ضروري تعملوا واجباتكوا .
_ استهيفوا كل مشاكلها ..
مشاكلها ؟ مشاكل ايه دة أم بامبرز اللي عندها مشاكل ؟ بنتكوا قبل الـ ٤٠ سنة
مبتقابلش مشاكل فعلًا ولا فترات إرهاق وتعب وضغط ووجع قلب وعياط و إحتياج
.. ماتسيبوش حد يضحك عليكوا ويفهمكوا أنها بتقابل مشاكل .
_ ماتخلوهاش تعيش مراهقة .. ماتسيبوهاش تغلط عشان تتعلم .. ماتفتحلوهاش مجال انها تيجي تحكيلكوا حاجة..
_ خليها تروح تدور على الأمان برا .. ماتخليش دموعها تهزكوا .. جمدوا قلبك عليها .. شُكوا فيها .
_ ماتحترموش اختياراتها .
_ علموها وخلوها تتخرج ثم تشتغل و تتجوز .. أوعوا تدوروا على موهبة تنموها جواها ولا حاجة .
_ خلفوا وجيبوا عيال و أنتوا مش قد المسؤلية ، مش مُشكلة .. العيال بيجوا برزقهم زي ما أنتوا عارفين .
_ ماتعملوهاش خصوصية .. دخلوا نفسكوا في كل تفاصيل و اختيارات حياتها .
_ أوجعوا قلبها و ابعدوها عن اي حد بتحبه عادي .. بكرة تنسى وتبقى كويسه .. و أهو كله طيش شباب يعني .
انووا بس انكوا عاوزين تخسروها و هي سهلة ومش محتاجة مجهود .
الكلمات الصعبه دى وجعت قلبى كأم
استحلفكم بالله قربوا من بناتكم
البنت اللى هى الزوجه والأم
بناتنا امهات المستقبل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock