تحقيقات

“امل اللقاني مع اشرف كابونجا” مؤسس اول اتحاد للمصارعة بمصر

رياضة يتبارى فيها شخصان أو أكثر يحاول كل منهما هزيمة الآخر 

من بين الألعاب الرياضية الأقدم في التاريخ، ومع مرور الوقت تطورت إلى العديد من الأساليب والأشكال المختلفة. طبقاً للاتحاد الدولي (FILA)، تلك هي المصارعه الحره …

حواري اليوم مع مصارع احب تلك الرياضه دون غيرها .. بل وحاول جاهدا بانشاء اول اتحاد مصري للمصارعه EWR
حواري مع المصارع .. اشرف كابونجا

حاورت .. امل اللقاني

 

🔴 بداية اود التعرف من هو اشرف كابونجا ؟

🔵 انا اشرف محروس محمد ( والشهره اشرف كابونجا )
من الاسماعيليه عزبة العقاده .. ابو سلطان
مواليد ٢١ يونيو ١٩٨١
🔴 متي كانت بدايتك مع تلك الرياضه ؟
🔵 بدايتي مع الرياضة كان عمري حوالي 16 أو 17 سنة لما كنت بلعب كونغ فو وأخدت فيه كذا بطولة عربية وأفريقية، بعدها دخلت الجيش ولعبت جودو واتوغلت أكتر في الألعاب القتالية الفردية بأنواعها” .
🔴 ازاي جاتلك فكرة انك تأسس اول اتحاد مصارعه مصري ؟

🔵 فكرة اتحاد مصارعة حرة مصري جاتلي وانا في الجيش ولما بدأت امارس اللعبه كان مع اخويا على مرتبة في البيت، “إلى جانب خبرتي الكبيرة اللي اكتسبتها من الجودو والألعاب القتالية فاتعلمت الحركات والسقطات المختلفة وأتقنتها، لحد ما بقيت أقدر أدرب فريق”.
🔴 قوللي بقا ازاي بدأت تنفيذ حلمك ؟

🔵 انا بدأت من حوالي ٦ سنين وقمت بانشاء صفحة على الفيس بوك اسمها مصارعة المحترفين EWR
وجمعت حوالي ١٥ لاعب وبدأنا نصور العروض اللي بنعملها لغاية ما جمعت فريق مكون من ٥٠ لاعب ولاعبه .
🔴 حضرتك جمعت فريق ! ازاي كنت بتدرب الفريق ده هل كنت بتدربهم في نادي خاص بيك ولا اشتريت حلبه مصارعه ياريت تشرح لنا ؟
🔵 انا كان عندي محل بيعته علشان احقق حلمي .. كان عندي محل نت كافيه ( سايبر ) يعني وبيعته علشان اشتري حلبه للمصارعه
لاننا كنا بنتدرب في القاهره و النوادي بقت تطلب مننا مبالغ كبيره، أقل حاجة 10 آلاف جنيه شهريًا، وأنا ماباخدش فلوس من اللاعيبة اللي معايا ومتكفل بكل حاجة في الموضوع ده.
فبنيت حلبه قدام بيتي، كلفتني أكتر من 40 ألف جنيه، علشان اقدر ادرب فريقي
كنت بدربهم أيام الخميس والجمعة والسبت من كل أسبوع، بحيث يكون عندهم وقت يتدربوا لوقت يصل الي ١٢ ساعه ، فيقدروا يتقنوا الحركات ويحفظوا التعليمات.
خصوصا ان الفريق بيضم لاعيبة من كل المحافظات، وفي لاعب من الهند واتنين من العراق.
🔴 هل يوجد شروط للالتحاق بالفريق الخاص بك ؟
🔵 اكيد طبعا
اولا لا يقل سن اللاعب عن ١٨ سنه
ان يكون يتمتع باللياقه البدنيه
ان يكون حسن السمعه والسير والسلوك
الحصول على شهادة خلو من الأمراض وذلك بعمل فحص دم لبعض الامراض مثال فيروس سي والايدز وغيرها …
وعمل فيش جنائي
🔴 تلك شروط الالتحاق .. من ناحية الشروط الخاصه باللعبه نفسها .. هل يوجد شروط للاعب اثناء التدريب ؟
🔵 اه دي شروط انا اللي بحددها اهمها
ممنوع ضربات اللي ممكن تؤدي لكسور أو إغماءات أو موت،
ممنوع ضرب آخر فقرة في الضهر أو تحت الحزام أو ورا الودن أو في الزور أو خلف الرأس،
بس برضو بعلمهم الحاجات دي عشان يعرفوها،
كمان بعلم كل لاعب ازاي لو اتصاب يكمل لعب على إصابته من غير ما تتفاقم،
غير إني جايبلهم حد من وزارة الصحة يعلمهم الإسعافات الأولية”

🔴 هل عرضت تلك الرياضه للجمهور ؟ وكيف كانت طريقة العرض ؟
🔵 اه عملنا عروض كتير وبدأنا
اول عرض في الاسماعيليه
وبدأنا نعمل عروض في اماكن مختلفه في القاهره والجيزه والبحيره والاسكندريه والقليوبيه والسويس
وعملنا عرض خاص لمستشفي سرطان الأطفال ٥٧٣٥٧
وبقالنا سنه بنعمل عروض هنا في الاسماعيليه
اما طريقة العرض كانت عباره عن اللعب والاستعراضات وكل لاعب بكون له شخصية بيجسدها، و أكتر ناس بيتفرجوا علينا أطفال، من أقل من 8 سنين لغاية سن 30 سنة، دول اللي بيحبونا.
واحنا صغيريين كنا بنحب ماروكلي والنمر وحاجات زي كده، دايما كان الهيرو بتاعنا بطل الكارتون، فأنا حبيت أجسد الحاجات دي في المصارعة، فتلاقي عندنا شخصيات زي القرد، في سبايدر مان،
في المجنون،
الرعب،
الشيطان.. إلخ.
بحاول أخلي الأطفال والكبار يسمعونا وأدخل عليهم البسمة”.

🔴 اشرف انت عملت فيلم قصير اسمه المصارع المصري .. كلمنا عنه و ازاي وصلت لأنك تمثل فيلم ؟
🔵 المصارع المصري كان فيلم تسجيلي قصير
كان واحد صاحبي اتعرفت عليه في ماسبيرو صاحبي ده كاتب
قولتله ايه رأيك تكتب فيلم قصير فوافقني الرأي وبالفعل اتكتب المصارع المصري.
كان بيحكي عن شاب نفسه يحقق حلمه ويكون مصارع مشهور وسافر القاهره وكان عايش مع خاله اللي كان خايف عليه جدا وبعدها بيتعرف على صحفيه مشهوره بالصدفه وكانت بنتها بتتخطف لأنها كشفت فساد كبير لرجال اعمال مشهورين
وانا ساعدتها اني ارجع لها بنتها
وبتتوالى الاحداث بقا ما بين اكشن وضرب وكشف فساد الخ …
🔴 ماهي امنياتك وفريقك في الايام المقبله ؟
حاجات كتير لاعيبة الاتحاد نفسهم يوصلولها، منها اللي قدروا عليه ومنها اللي لسه بيجروا وراه،
وانا الحمد لله “قدرت أسجل الاتحاد كشركة رياضية وبقى معانا سجل تجاري وبطاقة ضريبية وعملت للاعيبة كارنيهات، كمان على تواصل مع وزارة الشباب والرياضة وهما مبسوطين جدًا من اللي بنعمله. الفترة الجاية مافضلش غير الراعي عشان نقدر نقول احنا أهوه ونوصل بعروضنا للعالم العربي وكل الدنيا إن شاء الله”.
🔴 ان شاء الله ربنا يكرمك وتحقق هدفك وتوصل بفريقك للعالم كله
🔵 اللهم امين
🔴 سمعت انك هتدخل موسوعة جينيس هل ده صحيح ؟

🔵 اه باذن الله انا بسحب تريله بالمقطورتين طولها حوالي 19 متر
ووزنها 22 طن
سحبتها حوالي 50 متر
وبأستعد لدخولي في موسوعه جينيس باذن الله.

🔴 ربنا يوفقك يا كابتن .. في نهاية حواري مع اشرف اتمني لك وفريقك المزيد من التقدم
🔵 اشكرك جدا واشكر جريدتكم الموقره وفريق العمل المميز ودمتم سالمين


 

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock