اخبار

محمد ممدوح رئيس مجلس الشباب المصرى يكتب تجربة شخصية … مابين نيويورك والقاهرة

أخبار تحيا مصر // محمد محسن 
الصورة دي زي النهاردة من اسبوعين في نيويورك … واحدة من أهم وأعظم مدن العالم … نيويورك الولاية الأكثر تضرراً حاليا في الولايات المتحدة الأمريكية واللي سجلت لحد امبارح بس ما يقرب من ٤٠٠٠٠ إصابة مؤكدة بفيروس كورونا ومايقرب من ٥٠٠ وفاة … كنت متأكد وانا هناك أن فيه كارثة هتحصل هناك … كمية الازدحام وكمية التكدس من آلاف البشر في المطار من كل جنسيات العالم مع عدم الأخذ بالاحتياطات أو التدابير اللازمة … طابور الدخول لأول نقطة فحص امني عشان تعدي بس لمنطقة البوابات كان بيتجاوز الساعه ونصف … تدافع وزحام وتلامس واحتكاك يشابه كتير اللي الناس بتتريق عليه في أي كوميكس علي صورة من صور مترو الأنفاق بالقاهرة … الهوس والجنون اللي عند سكان المدينة وحمى الشراء لكل المستلزمات لدرجة ان البلد بقي فيها أزمة أن مفيش ورق تواليت … عدم أخذ الحيطة والحذر الكافي في الوقت المناسب أدى للأرقام اللي انتوا شايفينها دي واحنا لسه في البداية وواثق أن الأرقام هتزيد مع زيادة عدد المسحات للمخالطين للحالات في ولاية عدد سكانها اقل من ٢٠ مليون نسمة … الكل دلوقتي هناك دلوقتي سواء الكونجرس أو الأحزاب أو المجتمع المدنى والجيش والإعلام وكمان الشركات والقطاع الخاص بيحاولوا يحلوا المشكلة وحاكم نيويورك بيوجه مطالبات للسلطات الفيدرالية بزيادة حجم المعونات .
الوقت المناسب للإنتباه لخطورة المشكلة بيكون عليه النسبة الأكبر في حل المشكلة وتلافي الخسائر … قرار تعليق الطيران بمطار القاهرة وكارت الحجر الصحي اللي بتملاه وانت نازل من الطيارة وفيه كل البيانات اللازمة بما فيها رقم المقعد في الطائرة وآخر أماكن كنت في زيارتها آخر ١٤ يوم ووصف كامل للأعراض ووسيلة الاتصال بيك للمتابعة وكمان الكشف الحراري اللي بتمر بيه لمعرفة درجة حرارتك … ناس كتير بتتريق علي الإجراءات دي وبتقول ملهاش لازمة ومش كفاية حابب بس اقولكم اني علي مدار الشهر اللي فات زرت عدد من المطارات المهمة علي مستوى العالم زي مطار فرانكفورت في ألمانيا ومطار واشنطن ومطار ريتشموند في فرجينيا ومطار دالاس في تكساس ومطار بويزي في ايداهو ومطار بوسطن ومطار نيويورك ومشفتش الإجراءات دي وكان الاهتمام الأكبر بالتفتيش والإجراءات الأمنية مش الصحية ويمكن ده يكون ليه السبب الأكبر أن الحمد لله لسه الأرقام عندنا محدودة .
بعتذر عن الاطالة لكن الوعي والاهتمام وتحمل المسئولية مننا كلنا شىء مهم واساسي عشان نعدي الأزمة … ربنا يعدينا منها علي خير .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock